家陣環球市況立立亂，投資銀行冇炒人真係要劏雞還神。瑞銀（UBS）行政總裁安恩傑（Sergio Ermotti）竟然話想逆市擴充，計劃未來5年增加中國員工數目一倍。至於賓架們最關心今年花紅會派幾多，安恩傑就封嘴唔講。
瑞銀行政總裁安恩傑噚日喺上海接受彭博訪問時話，唔止中國，今年全球經濟同樣挑戰重重。佢話，現時中國同過去20年一樣充滿機遇，係時候諗諗點樣喺中國部署。
佢預計，瑞銀將會到中國招兵買馬，增聘600人，涵蓋業務有投行、證券、固定收入、資產管理之外，仲考慮請多啲後勤員工。
無他嘅，瑞銀喺中國賺到豬籠入水，舊年幫內地企業包銷債券、股票，同埋做併購顧問，收入有6億幾港銀，增幅超過四成，金額仲係4年最高，當然要發大去搞喇。