賭王四房千金何超盈前日在澳門舉辦「何鴻燊藝術獎頒獎禮」兼拍賣活動，除了母親梁安琪及細佬猷君撐場，好友林心兒、八姑娘何婉鴻及伍詠薇等都有出席。前晚拍賣成績達2億4千6百萬，超盈透露比預期好，但有待進步，希望可以一年做一次。
今日21歲生日的猷君早前宣佈與新加坡富商、西甲華倫西亞班主林榮福千金Kimmy Lim撻着，蜜運中的猷君前晚沒有帶女友到場，他說：「我都係啱啱喺新加坡返，但佢都有send message畀家姐。」超盈指Kimmy因其父也有慈善活動而未能到來。
媽咪最遲知
超盈與Kimmy是朋友，她表示得悉Kimmy與猷君拍拖也感到驚訝，但就大讚Kimmy是好女朋友。猷君則說拍拖第一個告知超盈：「佢哋係朋友，問咗佢批准先。」至於媽咪的comment？猷君指媽咪未見，去澳洲過元旦時才向媽咪解釋，但媽咪好開心，猷君又冧爆大讚女友：「覺得佢係夢寐以求、係男仔都想追到嘅女仔。」是否結婚對象？他說：「我得20歲，過兩日先生日。」
聽話做君子
問猷君舊愛白緯玲（Yumi）經常在網上貼相「贈興」，猷君即想走人，超盈代回應：「我覺得男仔對感情係有風度，唔應該comment咁多，要gentleman，要顧及𠵱家嗰個嘅感受。」猷君點頭認同。
四太被問到兩個兒子都拍拖時說：「人大咗要有唔同嘗試，拍拖係應該嘅。」可擔心超盈太忙冇男友？她笑說：「我都忙到都唔記得。」問可有見過猷亨女友陳瀅？她說：「所有女朋友嘅嘢我都唔會答啦，你問番佢哋啦。」
採訪：羅慧敏
攝影：沈健程