有錢就是任性，因傷缺陣上周六英足盃第三圈作客諾域治嘅曼城隊長高柏尼，以觀眾身份入場支持隊友；點知豪坐私人飛機返曼徹斯特時，飛機意外滑出跑道。好彩高柏尼同埋其他乘客都冇事，不過就搞到諾域治機場要暫停開放四個鐘，令隨後起飛嘅曼城大軍㗎飛機都要延誤。
講真英國又有幾大，曼城上周六作客西部嘅諾域治，我求大俠就查過google地圖，坐車就大約四個半鐘，以外國人生活環境絕對唔係好長途。不過有傷缺陣嘅高柏尼都算有心，冇列入球隊大軍名單，都飛去諾域治捧場，原本睇到球隊大勝3:0晉級係好開心，但返曼市個陣就出事喇。
累所有航班延誤
話說高柏尼同經理人book咗架私人飛機，上周六下午六點準備飛返屋企；點知喺諾域治準備起飛時，飛機就偏離跑道，最後緊急煞停喺跑道出面嘅草地上。機場事後就發出聲明，話當日一架Citation CJ2小型飛機發生意外，機組人員同四名乘客冇受傷。不過機場為安全計，要關閉跑道四小時，最後先將飛機移走，大約10點先重開，搞到所有航班都要延誤，包括同樣坐飛機返曼市嘅一眾曼城職球員，心諗如果坐車，一早就返到屋企大覺瞓啦。
比帥唔怕四條戰線
不過延誤事件就冇影響曼城領隊比歷連尼嘅心情，英足盃大勝晉級，英聯盃準決賽首回合雖然輸俾愛華頓1:2，不過次回合返主場仲有得追。冤家路窄，曼城周三英超快車就主場再鬥愛華頓，比帥就話：「球隊目前喺英超、歐聯、英足盃同英聯盃都有奪冠機會，以球隊目前陣容，我有信心四項比賽都可以兼顧。一月會好關鍵，除咗英聯盃次回合，仲有一啲緊湊嘅聯賽。我都想讚吓前鋒伊恩拿祖，喺球隊有傷兵問題下，佢能夠把握機會爭取好表現。」曼城周三對「拖肥糖」，伊恩拿祖或者可以繼續同阿古路合作攻堅。
