啱啱喺區選中成功連任嘅民主黨南區區議員區諾軒，前年別開生面喺電車上求婚，冧掂女友Jolie下嫁，原來呢位被網民形容極似港足教練Kim Sir嘅乳鴿仔，下月28日擺酒正式拉埋天窗。吓，2月28日咪就係新界東補選投票日？難怪佢有啲泛民友話頭痕，嗰日要助選喎，點樣分身去飲？
免惹賄選之嫌
八方勸泛民中人唔使擔心，皆因區諾軒好細心，冇錯係28日擺酒，但呢場係親友為主，政界中人到賀嗰場查實係27日中午，喺大埔科學園筵開逾廿圍。區諾軒話呀，當初定擺酒日子時，點知撞正補選？而就算係選舉前一日，都有唔少人未必可以嚟飲，至少代公民黨喺新界東出戰嘅楊岳橋「岳少」，就唔方便到賀，皆因任何候選人喺選舉期都避免出席飲宴，免惹賄選之嫌，睇民建聯周浩鼎點樣中招就知。
原來區諾軒日前參加支聯會舉行嘅聲援李波遊行時，特別向楊岳橋「認罪」，一嚟專登唔請佢、二嚟亦因為喺選戰前一日，無奈要「搶走」部份為佢助選人士嘅時間。佢話其實同周浩鼎都認識，一度忽發奇想，如果請楊、周一齊到場，同台加插辯論都幾熱鬧精采？最後當然只係得個想字，何況𠵱家參選嘅仲有方國珊、黃成智同梁天琦，混戰呢家嘢，當然不宜喺大喜日子上演。代表香港人上陣作戰嘅楊岳橋，梗係唔介意未獲邀，笑住回應：「咁佢唔敢請我，我咪喺場外鞠躬，叫大家多多支持囉」，明寸對手周浩鼎盛傳喺盆菜宴呼籲支持中咗招。喺度八方都祝就快做老襯嘅區諾軒，新婚愉快。
李八方
mailto:[email protected]