泊車仔大家見得多，泊車妹似乎比較少，日前喺大坑希雲街就有位美少女疑似代客泊車，但查實睇真啲會發現佢係當區區議員楊雪盈（圖）！雪盈BB為乜咁陰功豬要兼職搵外快？非也，查實呢個係佢嘅流動街站，咁似泊車檔，只因為條路比較窄，擺唔到枱凳，所以咪索性一個箱仔搞掂晒。事實上，雪盈BB至今依舊「區」無定所，皆因至今未搵到地方開辦事處，但佢對搵到落腳地唔太悲觀喎，因為佢透露，自從佢好難搵地方開議員辦事處嘅消息傳出，唔少人都主動話幫佢手搵舖。但佢話就算有棲身之所，佢嘅流動街站會繼續出動，以便同街坊接觸。