環球股市喺2016年首個禮拜表現慘淡，美股更迎來歷年最差開局。新一年「好嘅唔靈醜嘅靈」，韋恩「十大驚奇」預測今年油價徘徊每桶30美金已經中咗一半。
沙地阿拉伯同伊朗斷交，地緣風險升溫，但油價續向下沉。紐約期油、倫敦布蘭特期油上星期更跌落32美元水平，全周累計跌過一成。
而黃金亦終於有起色，現貨金今年已升4.5%，見每盎斯1103.58美元。黃金對原油比率亦出現變化，截至上星期五止，每盎斯黃金可買33桶原油，較平均值約16桶原油多出近倍。
比率反映油價跌幅比黃金更厲害，估計大戶繼續買金沽油。雖然早排市場睇美國加息，金價就失色，但人民幣貶值同A股熔斷機制夾擊，股市首星期都跌到仆直，資金又重回黃金等避險資產。
估計黃金對原油比率走勢再升高，油價將終極一跌。睇番沙地續以本傷人式壓低油價爭市佔率，美國又解除石油輸出禁運同伊朗宣佈擴大產能，挑戰全球原油庫存極限。所以油價回落到1973年石油危機時每桶10美元水平並非冇可能。
Captain Cool
本欄逢周一刊出