九龍倉（004）旗下尖沙嘴海港城又有筍工提供！海港城噚日宣佈，招聘「朱古力導嚐員」，時薪200大元，應徵者必須超級愛食朱古力，對朱古力文化充滿熱誠，鍾意以朱古力與人溝通，曉兩文三語，周五截止申請。
查實海港城今次招聘，係為本月下旬舉行嘅朱古力推廣活動做準備兼搞花臣，「朱古力導嚐員」到時會幫手介紹多個品牌嘅朱古力。成功獲聘嘅「導嚐員」將會接受培訓，品嚐多個品牌嘅朱古力，並了解各品牌歷史故事。照咁講，有人工又有得食朱古力，對於朱古力粉絲，的確係dream job。
海港城舊年年中為一個「超寫實雕塑公共藝術展」，都試過高調以日薪1萬元，招聘多名「藝術泳池救生員」，在場睇實以奧運選手Lauren Perdue為模板嘅人像雕塑，成功製造話題㗎。