今日再講番熊市尋寶嘅故事吧，話說喺2008年，因為冬天落街買衫而發現I.T（999）可愛之處，喺七年後嘅某一日，終於畀晉佳發現呢種久違而刻骨銘心嘅感覺。
話說小弟想買一把𠝹刀，第一時間當然係去文具店搵，但周圍行都發現唔到有文具店喎，入到超市又冇𠝹刀，結果行咗一輪先發現一間日本城，冇錯，主角就係日本城。
去到日本城，問完靚姐，仲搵你唔到！日本城嘅𠝹刀有兩種選擇，有大有細，小弟心諗買把細先啱用，點知一個package竟然包住兩把刀，好吧！盛惠15.9唔係乜嘢錢，照畀錢冇hard feeling。
呢個真實故事告訴大家三樣嘢，第一，隨住小型文具店、家居用品店式微，呢種舖頭已趨向集團化，日本城面對嘅競爭環境，不及一般人想像中激烈；第二，日本城喺冇同超市直接競爭嘅日用品方面，已有出現少許壟斷嘅迹象，因此，閣下可能會有落街唔容易買到文具、家品嘅經驗，最後要幫襯日本城；第三，佢嘅產品價格低，同時大家對佢嘅產品價格敏感度亦相當低，形成佢有一定嘅議價能力，一個package兩把𠝹刀，諗都唔諗就買，就係一個好例子。
晉佳突然對於經營日本城嘅國際家居零售（1373）產生好感，喺佢身上見到當年I.T的影子，下回再續。
晉佳
https://www.facebook.com/advanceguy1/