一年一度渣打馬拉松本月17日舉行，特步（1368）連續第5年贊助，亦係最後一年，首席財務官何睿博噚日出席賽前嘉年華活動時透露，有競投2017至2019年贊助權。
有趣嘅係，特步落本爭取贊助渣馬，都係想多啲人認識佢哋品牌，增加生意啫，但係𠵱家特步嘅產品主要喺內地有售，點解唔在港開店呢？
何睿博帶點無奈咁話，其實一直想喺旺角或者銅鑼灣開舖，可惜舖租一年過千萬元，好難計到條數。就算今次喺渣馬嘉年華入面擺攤位兩日，佢哋都唔敢拎太多貨落嚟賣，怕港人唔係咁接受。好在今年生意唔錯，前日生意已經等於舊年兩日嘅三分二，銷售額過十萬元。
講番特步贊助渣馬跑衫，首年藍藍綠綠俾人笑好似「史力加」上身，之後公司從善如流，今年呢件嘅設計亦正路平實，為紀念渣馬廿周年，衫側印有過去比賽日子㖭。