政務司司長林鄭月娥噚日去咗大埔社企項目「水陸墟」，為7,000平方呎嘅5D海豚地畫點睛收筆，呢幅畫係全港同類作品最大型，由20位青年藝術家同逾200名青少年、新來港人士、少數族裔同婦女合力而成；5D畫與3D畫唔同之處係，3D只可以用特定角度拍攝，畫中冇附加道具，但5D唔只有道具，仲可以多角度拍攝，唔會拍到界線。
林鄭多謝馬會贊助，令大埔區有新景點，仲同中聯辦新界工作部副部長楊小嬋扮鬼扮馬，四萬咁口「踩住」海豚鼻尖影相，政府新聞處仲發咗呢張相兼刊載fb，結果被網民狠批。有網民話：「中華白海豚俾你哋啲工程搞死晒啦，仲好意思攞佢哋嚟做宣傳？」香港海豚保育學會嘅fb亦分享此帖，形容係「公關災難」：「想做番件好事，就立刻為咗保護白海豚而放棄三跑工程啦！」