新年未到，經民聯青年事務委員會已經大搞新年派對，上周五喺監事會主席林建岳旗下餐廳開餐，有近70名青委會成員兼友好一齊玩返晚，岳少三女林愛兒都有到場，皆因佢都係青委會成員，仲同大家一齊selfie。
八方問過經民聯青委會主席張俊勇Thomas，佢話當晚大家玩得好開心，透露幾乎每個月都有搞gathering聯誼一番，希望更多友好了解經民聯。佢話林愛兒對青委活動都好捧場，今次有份幫手call人盡興一番。但Thomas強調玩還玩，青委都有做政策研究㗎，唔只飲酒食飯咁簡單。
岳少當晚亦同經民聯主席梁君彥、副主席林健鋒同秘書長石禮謙到場，唔知係咪想感受下年輕人嘅活力？據知佢哋喺現場都成為集郵對象喎！