喺警隊有「辣椒仔」之稱嘅總警司林曼茜，喺警隊擁有多個「第一」紀錄，包括首位警隊機動部隊（PTU, Police Tactical Unit）女教官、首位港督榮譽副官，仲曾經喺香港回歸交接時接待過英國皇儲查理斯；呢位喺警隊中打出一片天嘅辣椒仔，今日退休咯，結束31年警隊生涯。
Madam Lam退休前同八方聚首話當年，佢話女性要喺男人為主導嘅警隊做出成績，需要比一般人付出多10倍努力，而現今社會思想開明、男女平等，有信心將來出現首位女警務處長。
提醒下屬咪硬碰硬
曾經喺1999年同2001年先後擔任PTU大隊長同女教官嘅Madam Lam話，當時察覺到公眾集會日趨增加，前線人員面對唔少衝突，所以推動引進EQ及發展衝突管理訓練，加強前線人員運用多元化視角同應變能力化解衝突。佢成日提醒下屬一旦遇人「挑機」，必須冷靜處理，自爆試過喺遊行集會期間被一個年輕人用長鏡頭貼近面部拍攝：「我心平氣和禮貌同佢講：『先生，你咁近影相會拍得唔清楚，不如你行遠啲去影啦。』對方聽完之後就行開咗。好多嘢唔需要硬碰硬，否則，只會造成更多衝突。」Madam Lam亦試過喺街上被市民用粗口鬧，但冇理對方，「佢見你冇反應就會冇癮咁走開」。
當然，佢話大前提係市民尊重法律同唔可以破壞秩序。至於唔少人推動緊嘅辱警罪，Madam Lam話如果情況惡化，當局有需要研究辱警罪嘅立法問題，但係承認現時政治環境好難推行。
李八方
mailto:[email protected]