葡超勁旅波圖上周五宣佈炒咗教練盧比迪古，雖然隊波排緊聯賽第三，落後榜首士砵亭都係四分，但最近成績好頹，包埋葡聯盃，近三場得一和兩負；加埋之前喺歐聯分組賽，最尾連輸兩場出局要踢歐霸，所以波圖決定炒咗盧比迪古。歐洲傳媒話，波圖有機搵前華倫教練紐奴嚟教，甚至搵番波亞斯或者摩連奴返嚟！摩連奴畀車路士炒魷後仲未有嘢撈，若果佢返波圖，相信門將卡斯拿斯又要走佬。卡斯喺皇馬同摩連奴不和，最後搞到離開母會，如果咁都撞番摩帥就真係冤家！