2016年股市於一月四日開市就跣到四腳朝天，蘋果日報財經版話中港股市陷入7字魔咒。中國證監會好學唔學，學美國實施所謂「熔斷機制」（Circuit Breaker），只要滬深300指數跌咗7%，兩地股市就要停市，結果第一日實行箒，CSI 300就跌咗261.94點，即7.02%。於是全國股市即時停開，連累香港大跌587點，即2.68%。跟住一月七日開市十五分鐘，A股又試跌7%停市，搞到全球股市陷入小股災，中證監唯有自摑一巴，在一月八日暫停熔斷機制。蘋果日報話立法會主席早在專欄寫咗2016=777×2+77×6，一共18個7，今年個7字可能真係幾邪。問你服未？
中學同學來WhatsApp，玩數字遊戲，話2016等於666×3加6×3，共12個6字，六六六大順，順風順水；又2016=888×2+88×2+8×8，共18個8字，發發發發……一路大發；又2016=999×2+9×2，共8個9字，祝長長久久，天長地久，發到夠一夠；又2016=168×12，有12個168，祝大家12個月內個個月都一路發。一路發發發、長長久久、六六無窮，都係幸運數字啫，點知新年第一日開市就偏偏開個7字，廣東諧音就幾唔好聽嘞，係咪天意弄人呢？一月一日係破日吖嘛。
曆法大師蔡伯勵講三破，首先在「灼見名家論壇」提出，本欄曾有報道。蔡大師出版通勝，在華人地區係暢銷書，一月五日紐約時報居然講中國曆法通勝有英文版，係紐約一對夫婦Joanna Lee與Ken Smith合作繙譯嘅，英文版繙譯自一位香港建築師Warick Wong嘅幾代家傳通勝版本，英文版高度精簡濃縮，係袋裝書，最初係當做一個特別紀念版，配合紐約之「美籍華人博物館」（215 Centre Street, Manhattan）一個展覽，免費派發。點知派唔晒之通勝竟然有大把人買，於是成為每年「產品」，欲罷不能，可見西人，不識中文之華人對「通勝」好有興趣，講唔定有人會洽商蔡伯勵通勝之英文版權，行銷歐美。蔡大師之丙申流年預測，左丁山向蔣芸大姐乞求一份，讀過一遍，2016年真係要小心謹慎噃。蔡大師話政治上，商業上，糾紛較多，商業放緩，且金融市場淡靜，樓價有下滑現象。從好處看，就是先破後立，立秋之後香港局勢回穩，到咗冬季就休養生息，局面平靜。總括言之，2016年上半年根據蔡大師之睇法，海有波濤，待八月初五（9月5日）之後，先至穩陣。