好似香港嘅音樂頒獎禮咁，唔出席嘅歌手多數都冇大獎，德甲冠軍拜仁慕尼黑，可能心知周一喺瑞士蘇黎世舉行嘅國際足協頒獎禮，要拎大獎嘅機會唔太高，就決定全體職球員繼續留喺中東集訓，只係派球會大使畢列拿去充撐場面。
其實拜仁都唔係話完全陪跑，好似哥迪奧拿都入到最佳教練最後三強，最佳11人方面，門將紐亞當選嘅機會都好高，不過今次幾乎全體缺席，唔知會唔會得罪「方丈」國際足協呢？
至於金球獎，由美斯重奪嘅呼聲就高唱入雲，但網絡世界就唔係咁睇，據fb作出嘅調查，竟然有36%球迷認為基斯坦奴朗拿度（C朗）可以拎金球獎，而美斯嘅巴塞隊友尼馬，就以24%排第二，相反美斯只排第三位。另外，阿仙奴中場奧斯爾，就喺球會twitter回答球迷問題，當有球迷問佢覺得C朗定美斯拎金球獎嗰陣，奧斯爾就好搞笑咁答係槍手防中法米尼，真玩嘢。