曾幾何時，英足盃係球迷們一年一度嘅嘉年華會，當時未有個個星期睇波嘅福利，所以一年一度嘅英足盃大家都好期待，而呢隻盃亦成為咗各大電視台嘅秘密武器，亞視最早用，80年代開始播，無記之後亦搶過；90年代中期收費電視加入戰團，未買到英超之前嘅有線就係用英足盃嚟吸客，可以乘機用吓曼聯、利記、阿仙奴嘅logo，街頭sell客嘅banner亦可以印碧咸、傑斯、奧雲仔啲靚樣去吸睛。
盤古以來，英足盃嘅賣點就係爆冷，各支勁旅一踢呢個盃就好似成為眾矢之的，低組別甚至業餘球隊抽到對強隊都好似飲大咗，硬係要挑戰難度打大佬，而睇波嘅朋友仔亦好似睇動作片咁，通常都會幫被睇低一線嘅球隊，彷彿大佬強隊就一定係奸嘅，係大蝦細嘅，當細路弱隊落足11成力偷到雞和波重賽甚至爆冷贏波，睇波嘅球迷們係happy多過唔happy嘅，皆因強隊當年都未係咁多fans（同𠵱家比），所以當年睇英足盃，並唔係睇波咁簡單，而係好似睇緊窮小子打出頭嘅勵志電影咁。
不過爆冷溫床慢慢其實係out咗，因為過去十幾廿年嘅睇波文化，各大主流球隊已經孕育咗一班忠實fans，本來係大多數嘅中立球迷其實已經越來越少，就算你係忽然球迷，你都會去支持家人、愛人嘅愛隊，加上英國足球圈富者越富嘅現實，強與弱隊之間嘅距離已經越來越大，爆冷比率越來越細。簡單嚟講，球壇越來越難出現奇蹟。
今年英足盃暫時冇人播，惋惜嘅球迷唔係太多，有啲甚至認為英足盃阻頭阻勢搞到周末冇英超睇；而球隊考慮到聯賽排名嘅得益遠遠高於一隻盃仔，落力可能只係訪問時順口嘅一句客氣話。加上家陣要睇爆冷嘅驚喜賽果，其實英超差不多個個禮拜都有。萬一唔夠的話，社會上光怪陸離嘅事件，多到你消化唔到。或者今時今日，我哋已經唔需要太多驚喜，只求少一啲意料之外。
KEYMAN
節目主持