司馬燕老公吳忠義（Togi）前日被目睹與長髮新歡，喺銅鑼灣一間酒店內露天酒吧調情激咀，舉止旁若無人，東窗事發後，Togi狼狽拖實新歡離開酒店。
而吳忠義去年被爆與內地小三孫君子（Summer）暗交，令佢愛妻號形象一鋪清袋，還被冠以「世紀賤男」。有時有啲嘢真係咁啱得咁橋，原來Summer嚟咗香港，噚晚七點現身中環ifc。佢化咗妝紮起頭髮，身穿乾濕褸及藍色連身裙，身材玲瓏浮凸，「巨咪」相當跌盪。Summer先由ifc行去蘭桂坊附近世紀廣場對面嘅莎莎買嘢，再行返去ifc，沿途都有講電話，仲講到手舞足蹈。
之後Summer去咗ifc四樓平台，入咗一間酒吧，原來約咗一個外籍男子，兩人原先坐喺酒吧外，仲面向海景，但坐咗一陣，未知係咪覺得凍，跟住返回酒吧室內，兩人坐喺角落位置，期間兩人有傾偈，但Summer不時皺眉，狀甚勞氣，唔知係咪為Togi一事煩擾呢？