英國馬莎百貨跟本港零售業一樣遇上寒冬。英國馬莎噚日公佈，舊年聖誕嘅服裝銷售係歷年最差，馬莎行政總裁博蘭德（Marc Bolland）同日突然宣佈退休，話做到今年4月走人，唔知係咪生意差，冇得留低呢？
55歲博蘭德掌舵馬莎5年幾，舊年聖誕服裝與家品銷售大跌5.8%。其實，全球冬天異常和暖，唔好話香港12月有廿幾度，倫敦上月聖誕節都有16、17度，買新衫換季嘅人少咗好多，生意好極有限。
今次博蘭德宣佈退休，外界覺得幾突然。英國馬莎就搵咗48歲嘅Steve Rowe接替，聽講佢係馬莎老臣子，服務公司超過25年，負責零售與網上銷售兩大範疇。Steve將於今年4月2日履新。