被喻為「綠葉王」的資深藝人梁健平，在電視圈捱足28年，不過令他更為人注意的反而是電影。他主演的短片《三輪車伕》（Tricycle Thief），早前在多倫多國際電影節奪得最佳短篇電影獎項。近日大熱的電影《十年》，他有份主演其中一個短篇故事《方言》，現實生活中的梁健平與戲中飾演的的士司機遭遇一樣，他兩個囡囡經常以普通話跟他交談，但他依然認為廣東話不死。
撰文：何永寧
梁健平日前接受本報專訪，談到他有份主演近日被熱捧的電影《十年》。他指《十》片內容具前瞻性，內容觸及不少香港敏感話題，如普通話與廣東話之爭、23條立法及本土意識，但作為其中一個參與者的他最初亦不明所以：「開頭以為係後生仔女、憤青去睇，點知好多我呢啲中坑都睇，真係唔知乜嘢事。唔知係口碑相傳，定套戲傳遞到一啲訊息出嚟。我諗話題性同埋觸及社會敏感問題，其實我拍嘅時候唔知其他古仔。」
廣東話唔會死
在《十》片5個短篇故事中，梁健平主演的名為《方言》，他飾演一名的士司機，荒謬之處是他考不到普通話牌，所以不能夠在遊客區接載乘客，就連兒子都用貝克漢姆（大衞碧咸）這個內地叫法談論足球。講到廣東話會死，他肯定的說：「廣東話方言肯定唔會消失，過咗一百幾十年我唔知，至少我死之前一定唔會。我哋之前係殖民地都係要學英文一樣，只不過𠵱家係學普通話。」
梁健平開玩笑表示正職是爸爸，演員只是副業，育有兩位分別17、18歲的囡囡，他自言跟片中的士司機遭遇一樣，兩位千金試過以全普通話跟自己交談，他說：「好吖！啲學費冇嘥，冇唔開心。佢哋好多時都講普通話，可能學習上面需要。兩位囡囡講到好字正腔圓，我前年拍韓劇《命中注定我愛你》嗰時都要向佢哋請教普通話發音。」梁健平覺得所謂「廣普」之爭是融合中的一種爭持。
唔驚秋後算賬
梁健平對《十》片5個短篇中最深印象是《自焚者》，他說：「最後嗰幕阿婆自焚好震撼，我睇到嗰種冇力感。至於23條係咪要立法，我覺得應該透過討論同埋公投去攞個平衡，亦都要畀大眾搞清楚來龍去脈。」
被問到會否擔心接拍類似帶有政治隱喻或是題材敏感的電影，而影響到返內地拍劇或工作時，他笑說：「我睇完套戲就打畀導演同佢講笑埋怨話，『我好似畀你賣咗豬仔咁』。事實上我接戲嘅時候都唔知其他四個古仔講乜嘢。我反而覺得《方言》個故事幾輕鬆，其實電影係畀人一個夢，光同影嘅結合變為一個夢，唔會成日拍嚟拍去都係警匪。你話秋後算賬，我諗拍另外四條片嘅演員擔心多啲。我覺得係咪咁大件事呢？我哋中國係一個泱泱大國，點會咁小器，為咗我哋拍套咁嘅片而去清算或者嬲，我唔係好相信呢樣嘢會發生囉，如果真係我會好無奈。」
場地提供：Griller Sport
十年預告殺到埋身
近日大熱的電影《十年》由5個短篇故事組成，分別是《浮瓜》、《冬蟬》、《方言》、《自焚者》及《本地蛋》，5位導演以獨立電影的拍攝手法，預言10年後香港會是一個怎樣的光景。沒有大明星壓場，但震撼力足以令facebook日日洗版，電影開賣初期更場場爆滿，到近日加開院線情形才有改善。
《十年》吸引的地方是帶出觀眾關心，卻預視不到的景象包括23條立法、普通話取代廣東話及「本土」二字已成為禁忌詞，似遠還近殺到埋身的問題。
