友邦強積金CEO馮裕祺化身調酒師，為大家調咗杯夠晒節日氣氛嘅「signature drink」，唔知佢平時係咪都食得健康，近睇膚色真係幾唔錯喎！
馮裕祺平時見傳媒有好多諗頭，2014年佢試過整fusion甜品跟傳媒朋友分享，噚日佢就帶大家去咗堅尼地城一間素食餐廳開餐。為配合主題，佢仲親自用紅菜頭、小紅莓、檸檬汁、糖漿，調配咗杯極具抗氧化功效、啱晒「愛美」一族嘅特飲畀大家品嚐。平時飲多啲呢類平靚正嘅飲品，抵過去做facial！
話時話，以男士嚟講，馮裕祺啲皮膚算係幾好，白裏透紅，而且冇暗瘡，肯定係平時做足保養，食好多紅菜頭喇，點知馮裕祺竟然話唔太喜歡紅菜頭，覺得陣味太似食草，今次溝埋小紅莓汁先容易入口。