喺港超東方轉會到中甲天津權健嘅港腳基藍馬，早幾日隨隊到咗巴西參加季前集訓，而呢位歸化港腳就因衣着夠潮，天津電視台仲專訪佢，連高登男神榜都搵埋出嚟，可以話未踢先贏人氣。訪問以「基藍馬：黑又硬之下那顆時尚的心」為題，旁述話基藍馬以一身黑色禮帽、粉紅色外套同白色長褲亮相巴黎戴高樂機場（上圖）向球隊報到令人眼前一亮，如果唔知佢嘅職業，仲以為佢係明星喎！
基藍馬就話，有睇佢社交網站都知佢係個時尚達人，而專訪入面仲煞有介事咁講呢期高登男神榜，因為基藍馬打入咗第10位，勁過張家輝同金城武等男星，相信呢位「黑又硬」嘅港腳返到天津會繼續受到追捧。有機會同基藍馬喺中甲交手嘅港隊另一入籍兵保連奴，因回鄉證問題要續期，噚日留喺傑志中心獨操，佢收操就話，已同中甲深圳簽咗兩年約，而北上非純粹賺取高人工，而係想挑戰自己，睇睇有冇可能去到中超。佢仲話，深圳同香港好近，老婆又要做嘢，所以冇諗住去深圳住，仲會搬去大埔，方便日日往返中港兩地。