做咗9年領展（823）主席嘅蘇兆明（Nicholas Robert Sallnow-Smith）即將於3月31日離任，領展噚日公佈候任主席，由60歲、羅兵咸永道會計師事務所前合夥人聶雅倫（Nicholas Charles Allen）出任，又咁啱，兩人都叫Nicholas。
領展公佈，聶雅倫經過董事會主席遴選工作小組，從多名候選人中選拔成繼任主席，佢2月1日先擔任獨董，4月1日正式做主席。
財金界對聶雅倫較深刻嘅印象，可能係1992年佢被前財政司麥高樂委任為獨立調查員，調查聯合集團、涉及10間上市公司嘅涉嫌串謀訛騙案。聶雅倫2007年退任羅兵咸永道合夥人後，現時擔任中電（002）、希慎（014）同聯想（992）獨董，亦係香港財匯局名譽顧問。