近幾年睇美斯踢波，覺得佢已經去到一個超越凡人嘅境界，懶懶閒、笑嘻嘻、輕輕鬆鬆就搞掂你，真係笑傲江湖，獨霸天下，好耐都冇見佢踢得有火。不過，愛斯賓奴呢支巴塞隆拿嘅同市宿敵真厲害，喺禮拜三場西盃大踢暴力足球，全隊拎八黃兩紅，激到球王美斯（圖）火到嚟。最後，全球最高身價、盛傳攞硬呢屆金球獎嘅美斯交出兩入球同兩助攻，幫巴塞主場反勝愛斯賓奴4:1。
愛奴收山腳激嬲球王
巴塞上場聯賽作客愛斯賓奴被悶和0:0，到周三呢場西盃16強首回合，兩隊又再對過，呢次到巴塞主場。愛斯賓奴作客魯營，決定用暴力戰術去對抗巴塞，結果激起巴塞把火，輸鑊甘！愛斯賓奴今場全隊被罰八面黃牌，其中靴蘭佩雷斯同柏巴高尼迪奧普各拎兩面，兩黃一紅被逐。講到呢場波最肉酸嘅一下，肯定係53分鐘，愛斯賓奴門將柏路盧比斯同美斯爭波倒地，佢起身嗰陣，一腳踩落美斯嘅足踝度，簡直係想收人山！球證睇唔到，冇罰到；美斯就嬲到彈起，如果唔係蘇亞雷斯及時拉住，話唔定大家會見到美斯打人。
見到隊友同埋自己被人挑釁，美斯開啟「憤怒模式」，要畀啲顏色對手睇。雖然愛斯賓奴先入波，但美斯先梅開二度反超前，之後再畀兩個助攻，分別由碧基同尼馬建功，最後巴塞反勝4:1。呢場唔單止美斯嚟真火，成隊巴塞都好似想食咗愛斯賓奴咁，到補時仍然繼續搶攻。完場後，據報蘇亞雷斯、碧基同馬斯真蘭奴仲喺球員通道等愛奴啲球員入嚟，引發罵戰，好在兩邊教練同保安及時制止。西班牙傳媒指球證喺賽後報告中點名話阿蘇帶頭搞事，所以阿蘇有機被秋後算賬。有記者問巴塞主帥安歷基賽後雙方有冇打交，佢就話：「衝突？佢哋只係唱聖誕歌。」安帥另外暗插球證執法太鬆手，「球證係控制比賽嘅人，佢哋可以決定呢場係足球定係美式足球。」
身價21億全球最高
雖然對手小動作多，但巴塞順利贏波，阿達杜倫同阿歷斯維度又上演處子戰，兼冇球員受傷，都算美滿結果。返到屋企後，美斯仲要揀定套西裝下周一去拎金球獎。國際足協禮拜三唔覺意喺網上洩漏咗金球獎得獎名單，美斯將第五度當選，雖然國際足協闢謠，但求大俠覺得闢唔闢都冇乜所謂，反正全世界都估美斯呢屆拎硬。據博彩公司威廉希爾嘅賠率，美斯得獎熱到得1.04倍。另外，研究機構CIES足球觀察發表報告，美斯係全球最高身價嘅球員（見附表），為1.85億鎊（約21億港元）。
