2016年開局認真大吉利是，首先中國開市未夠一星期，已兩度跌到要「跳fuse」，穩定咗幾個月的A股暗湧再現，中證監雖出招限制大股東賣股，但芬佬普遍認為作用不大。
至於香港，元旦日的財經頭條已是凶宅劈價，接着銀行裁員，投行界一片風聲鶴唳。朋友說，除了Barclays已鐵定摺埋大部份cash equities業務外，還有另一間投行丁，近日亦給予員工兩個選擇：1.食肥雞；2. 簽過份合約，逼你由permanent轉做temp，臨時約為期一年。「就係因為咁，佢哋最近一個月炒咗20人左右啦，我估遲早都係要成檔摺埋㗎喇！點搞呀今年！」
另一投行朋友坦言，港股大時代後，大市交投早回復平淡，如果無IPO、私銀部門可以做cross-selling，實難有錢賺。再講，投行開到一街都係，但就個個爭住做同一堆大account，早就供過於求，如中小行沒有自己的niche，今年將極度難捱。「目前除咗中資投行、個別仲有請人外，外資行全部cut緊人，傳聞M投行近日都開始零星裁緊分析員，好大鑊。」
今年香港經濟最大的變數，將是人民幣貶值，貶幾多、跌幾耐，對企業盈利打擊不在話下，本港資產價格調整的深度，亦將取決於此。奉勸各位，持盈保泰，小心為上。
海迪