港台「第38屆十大中文金曲頒獎音樂會」前晚結束，容祖兒12連霸「最優秀流行女歌手大獎」，成為史上最強，完騷後她笑說：「懷疑公司應該要頒老人金畀我，如果每年數上去唔係辦法。」還笑問身旁的張敬軒：「你未來幾年會唔會去頒獎禮？如果得自己一個好孤單。」軒仔抵死反問：「你幾時攞金針獎？金針菇獎，哈哈！」
泳兒等母醒才嫁
英皇為慶祝旗下歌手在2015年頒獎禮狂擸73個獎，昨在尖沙嘴舉行祝捷會，曾因祖兒缺席前年新城頒獎禮，嬲到豎中指捽鼻的新城電台高層朱明銳，昨亦現身到賀，並跟祖兒祝酒碰杯，化干戈為玉帛。祖兒說：「我好乖，有打招呼。」軒仔抵死問：「你啲手指有冇郁吓郁吓？」祖兒答：「大哥（英皇高層吳雨暱稱）曾經想捽鼻，我都即刻制止。」對於將退休的銳哥承認豎中指闖禍，祖兒說：「大家都係成年人，唔會計較呢啲小事，我認識銳哥咁多年，佢對我嘅好唔會忘記，嗰刻少少情緒表達出嚟冇問題，佢大情大性。」
此外，同場的泳兒被問到媽咪病情，她話：「喺醫院未醒，但面色好番啲，盡量每日探媽咪。」會否考慮結婚沖喜？她說：「就算係，都想等媽咪醒番。」
採訪：曹家誠、王連連
攝影：陳俊強
