今年開市幾日跌到啪啪聲，真係唔敢想像今年MPF有乜表現，就連積金局主席黃友嘉都開始沽貨！
聯交所資料顯示，身為中國9號健康（419）獨董嘅黃友嘉，喺上月下旬開始分3個交易日將佢手上200萬股9號健康沽晒，套現超過200萬元，3日沽貨嘅平均價都超過1蚊，9號健康噚日已經跌到0.97元，果然好眼光。
呢隻9號健康絕對唔講得笑，公司上月先公佈，引入華誼兄弟、騰訊（700）、馬雲持股四成嘅雲鋒基金做主要股東，夾埋揸超過50%股份，更加係騰訊主席馬化騰與阿里巴巴創辦人馬雲首度聯手在港買殼，真係令人有無限憧憬㗎。
但留意番，華誼與雙馬嘅入股價係每股8仙，加埋呢排個市咁弱，黃友嘉沽貨獲利都合理。