一位讀者署名Cheung（姓張？）來電郵：「你不要再做大企業掮客，如要減排，應加稅不是加價。加稅所得應專用作潔淨能源的開發或補貼，不能只進大企業的口袋。」
呢位讀者C嘅觀點，與社會上有不少左派思想、社會主義思想人士相同，殊不知在現實經濟，完全錯誤。讀者C或者唔多瞭解，向企業加稅嘅最終結果就是加價，加價幅度視乎需求彈性而定。以電力公司嚟講，加稅導致加價往往係政治角力，如政府與電力公司談判不成就可能按照利潤管制協議條款，鬧上法庭或仲裁。若不加稅，又不准加價，按資本主義定律，電力市場必然出現投資短缺，長期電力供應不穩定嘅局面。
不信資本主義，香港大可效法中國大陸，實行電力價格管制，由發改委決定電費及油價，香港冇發改委，咪由環境局及特首決定囉。香港人如果喜歡如此，環保界、社福界人士喜歡如此，左丁山之流自然要收聲收檔。
以加稅所得來補貼開發潔淨能源，即是打劫電力公司，明益「新能源開發商」，一樣係大企業得益。試問邊個去開發潔淨能源呀？咪又係電力公司或財團，因此類銀碼投資以億萬元計，中小企首先行埋一面，如果政府聲言有補貼嘅話，大企業「尋租」活動一定興起，就好似美國聯邦政府津貼農業，益晒啲大資本農企公司及大業主農場富翁一樣。奧巴馬上台後，曾以稅務優惠津貼太陽能開發公司，結果係慘淡收場，拿納稅人啲錢去扶助一啲失敗企業。世界上高唱開發潔淨能源嘅國家一係用國企開發，一係用公款補貼，香港冇國企補貼，就會變成係官商勾結，明益大財團，如為了減排而搞出呢類大頭佛，香港人又會嘈到坼天。中國為咗避免低油價導致耗油量大增，索性「加快減慢」，直情唔批准油價再跌，呢點其實係資本主義經濟學，用較高價格來控制消費，壓抑需求，相等於梁特嘅地產3D辣招，令到中產階級換樓困難一樣。廿一世紀講減排，等於講宗教信仰，減排最有效方法係推高油價煤價，降低太陽能風電價格，廣用核電，現在油價大跌，煤價大跌，核電是禁忌，潔淨能源價格比較昂貴，窮國有乜誘因減排呀，窮國有起碼四五十億人民，叫佢地食西餅唔好食麵包乎？駡左丁山隨時歡迎，不過請諗清楚經濟邏輯。