又一個發夢都想做歌手的富二代，不過他是非一般的富二代，27歲的馬天佑（Tianyo），3年前靠形象設計師做到風生水起，是不少天王天后如周杰倫、蕭亞軒、容祖兒、Twins和楊穎（Angelababy）的御用形象設計師，被視為演藝界的名牌。Tianyo白手興家開設製作公司，搞Cake Boutique，最近又開經理人公司簽80個Bloggers，卻突然轉軚嚷着要做歌手，由新人做起，除了喜歡音樂，Tianyo說：「Nothing to lose！」
撰文：楊潔雯
年輕人應該不怕死，不怕輸，才會有可見的未來。馬天佑屋企有錢，爸爸做生意，兩個哥哥做金融賺大錢，在屋企人眼中Tianyo是異類，着衫標奇立異，行為古怪，金融、經濟一竅不通，不過到最後他仍然堅決要走自己想走的路，聽說他在英國London College of Fashion讀Fashion branding，回流香港不收分文在唱片公司打暑期工，又自薦到其他部門幫手，從中得到不少工作機會，擴闊了人生視野，現在他已經是製作公司老闆，養了20幾個年輕人。
Tianyo說：「我公司全部係小朋友，都係啱啱畢業咁，我見得太多香港年輕人，成日interview，真係有心做有辦法，你就做喇！我最憎啲人怨天、話乜做唔到，我做styling，之前都冇人做喇！點解我可以做到？我都可以唱歌，開到蛋糕店，唔好同我講唔得，我都冇靠屋企，係自己逐步逐步做，想畀佢哋知道唔好怨世，香港年輕人係極度怨世，大家positive啲，我覺得東家唔打，打西家，香港人壓力好大，點都要做，做得開心啲。」
爭取唱歌機會
馬天佑擁有自己的事業，卻不怕放低身段，去年低調加入黎明的A Music做新人，他已經做足心理準備，不怕人冷言冷語，被人譏笑，他說：「我完全OK，百毒不侵，你鬧我，我OK㗎！自細好鍾意音樂，所有都係緣。
「其實咁耐以嚟我冇強求過任何嘢，形象係咁啱得咁蹺有呢個機會，好似做起咗咪繼續做囉！唱歌係我真係想做，真係我自己爭取，之前做好多同音樂有關嘅project，又好多做嘢嘅人問我點解自己唔試吓，好多人講呢啲說話，咁就不如試吓喇！咁就一步一步，又冇死嘅，nothing to lose！我又唔係呢一刻要紅，我唔需要呢樣嘢，我只係想建立音樂上嘅品牌。」
打好底：贏在起跑線
正所謂，知己知彼，百戰百勝，要在樂壇站穩陣腳，先要知道市場走勢，馬天佑又憑甚麼可以做歌手？
Tianyo說：「第一，我屋企係音樂背景，我爸爸媽媽其實係唱京劇，我喺呢個環境之下大，所以我識行音樂呢條路，一定唔會輸畀其他人。加上我由細到大已經study，由梅艷芳年代開始了解，佢哋點樣出碟、宣傳，我呢隻唔係普通fans嗰種，我係好有興趣去study研究，亦知道唔同年代點樣玩法，呢個年代有時新穎嘅嘢要加傳統玩法，呢樣係我強項，我又有音樂底子，我又唔怕辛苦，乜嘢都做，乜嘢都願意。」
