當全港非業主都等緊樓價跌，摩根士丹利竟然預測港樓今年全年升5%。
大摩睇升樓價嘅理據冇乜特別，主要都係供求失衡同息口低企。該行話香港25歲以上人口增加同首次結婚人口上升，會支持房屋需求；而新移民、非本地學生，同埋來港工作嘅專才，亦係房屋需求嘅來源。至於供應方面，大摩話市場同政府以往平均高估房屋供應20%至25%，相信未來亦會如此。
作為業主，睇到上述睇樓價升嘅理據，肯定會鬆一口氣，不過想趁樓價下跌買樓嘅人士，聽完大摩嘅分析應該都會好無奈（包括筆者），因為大摩唔只認為樓價短期唔會跌，仲指出以往樓價大跌都係因為有危機發生。
大摩解釋，港樓過往廿年大跌，都係由重大宏觀經濟事件所觸發，好似係亞洲金融風暴同金融海嘯咁，但由於現時未見到香港即時會有危機出現，所以估計樓價今年首季就會見底回升。
一如大摩所言，樓市大跌往往係經濟最PK之時，所以對於失業被炒嘅時候，反而係買樓時機嘅講法，筆者是絕對認同。
因為當經濟差到裁員成風嘅地步，亦係包括樓市在內嘅所有資產見底並準備回升之時。不過要喺呢個時間撈底，前提係閣下失緊業都仲有錢畀首期兼供樓。
睇完大摩嘅觀點，筆者嘅結論係，要喺樓市撈底係一件極度困難嘅事，因為首先你要詛咒自己失業，問題係當經濟環境真係衰到落谷底，即使閣下擁有預示樓市見底嘅眼光，仲預備好足夠首期，兼且失業中都具有上車嘅勇氣同霸氣，sorry，你都未必可以上到車，因為銀行呢個時候未必會肯批按揭畀你！
El.
本欄逢周二、五刊出