意甲前列繼續叮噹馬頭，周三上演九場比賽，四支前列分子全部贏波。國際米蘭今季第九次贏1:0，作客安玻里小勝保住榜首，繼續以一分領先費倫天拿同拿玻里，同第四位祖雲達斯亦只差三分。祖記延續歇冬前嘅強勢，周三喺主場以3:0大勝維羅納連贏八場聯賽，中場保羅普巴賽前特登飛個髮，側邊鏟咗個「DAB」字樣（圖），等到開波八分鐘由保羅戴巴拿先開紀錄，即刻一齊玩近期好流行嘅DAB慶祝入球動作，即係好似幪面超人變身個姿勢。