【銅鑼灣】溫拿下月喺紅館舉行演唱會，年廿八開始同觀眾一齊過年。前日隊員葉智強趁未開騷仲得閒，一個人去咗行銅鑼灣，佢先入咗一間鞋店睇爬山鞋，睇咗大約15分鐘，但都揀唔啱心水，離開後繼續行街，入咗第二間鞋店，同樣係集中睇爬山鞋款，唔知係咪想趁農曆年前買新鞋行山呢！着橙色外套嘅阿強幾搶眼，全程雙手蹺喺後面慢慢睇慢慢揀，其間有男店員都有跟住阿強身後，不過唔知係咪太年輕，竟然認唔到佢係溫拿嘅阿強呢，最後阿強睇完一輪，都揀唔啱款連試都冇試着，空手而回。採訪、攝影：梁繼光