馬會嘅騎師王彩池，即係落注估邊個騎師成績最好，估中全日得分最高的騎師就中彩。
由於雷神莫雷拉獨大，今個馬季佢參加過29次賽事，喺騎師王勝出20次，唔買佢往往冇錢收，但買佢往往得1.1倍賠率太低，搞到好多馬迷話唔好玩，個彩池太悶喎！不過，博彩呢樣嘢，你會揀悶悶哋咁贏，定好刺激咁輸呢？
「萬事勇」馬主伍燕梅就話：「我寧願選擇第二個囉(好刺激咁輸)，我鍾意刺激囉，未必一定輸嘅，刺激都有贏面！」
「瑰麗傳奇」馬主文壽強就有唔同睇法：「我揀悶悶哋贏錢，初頭入行賭錢都鍾意刺激地輸，最緊要刺激，但玩得耐自然最終都係想贏錢。」
當然啦，有啲馬迷鍾意其他騎師，但原因幾特別。記者：「你有冇買騎師王？」馬迷鄧先生：「潘頓囉，我長期買佢，因為佢個女遲我一日生日。」
唔少聲音認為騎師王彩池需要改革，馬評家方駿暉就話：「馬會應該好似讓球主客和足智彩咁樣，莫雷拉讓分，譬如讓20分，令到買莫雷拉有好啲賠率。」
即係話就算全日雷神攞到36分最高，排第二潘頓得24分，但因為雷神讓20分，最終騎師王勝出者會係潘頓，咁樣改革大家認為work唔work呢？