皇馬搵施丹頂賓尼迪斯做教練，江湖傳聞令「大聖爺」加里夫巴利好唔高興，曼聯亦睇準機會出手，仲使出傑斯呢張人情牌，希望可以用破球會紀錄嘅7,500萬鎊（約8.5億港元）簽到巴利返嚟。
施丹落嘴頭留巴利
有指巴利對於好關照佢嘅肥賓俾皇馬炒咗感到好失望，於是施丹嗱嗱臨出嚟安慰呢位26歲威爾斯國腳翼鋒。施丹周二喺記者會就咁話：「巴利對我哋好重要，佢係球隊嘅基石同埋係好關鍵嘅球員。我會全力支持佢，希望佢會繼續有出色演出。」雖然施丹話會繼續重用巴利，但曼聯一於少理，計劃出價7,500萬鎊，仲會派出曾喺威爾斯國家隊同佢合作兼且係佢偶像嘅傑斯做說客，以游說佢由巴拿比奴轉戰奧脫福。
消息仲指，雖則曼聯唔可以好似曼城或車路士咁開出30萬鎊周薪畀巴利，不過巴利如決定重返英超嘅話，有傑斯做助教嘅曼聯仍然會係首選。