憑一套本土電影《狂舞派》成功彈起的顏卓靈，雖然今年只有22歲，但轉眼已變成香港影壇中的一位小師姐，在過去一年她繼續為電影夢而努力，不禁令人聯想起大家熟悉的小王子，內心雖然擁有一顆童真，但卻為追夢而努力，希望能夠開出一片屬於自己的玫瑰花海。在內地剛上映的新戲《鬼吹燈之尋龍訣》內，顏卓靈更有機會與陳坤、黃渤、舒淇及Angelababy 等影帝影后級卡士大鬥戲法，「同鑽石卡士合作係有壓力！就當一個嘗試，經過今次之後就可以壯膽，見乜嘢大場面都唔會再驚喇！」
統籌：林妙萍
撰文及造型：陳蔚渝
攝影：周樂恒
化妝：Hubei Har
髮型：Hugo Poon
顏卓靈在新戲《鬼吹燈之尋龍訣》內飾演「洋子」一角，化身為一名日本少女，除了為角色剪掉一把長髮，更在拍攝的四個月內漂染了七次之多，大呼導致頭髮一碰水就溶，頭也不敢洗，不過卻因為一頭紫白色短髮的帥氣造型，意外吸納了不少女粉絲。
開口中做打女
雖然在戲內飾演一名少女，不過顏卓靈卻笑言自己變成了大家眼中的少年，「佢哋話畀我掰彎了，即係拗彎咗變成萬字夾，意思就係指啲女仔鍾意咗我，因為呢個角色，佢哋會成日叫我老公。」今次戲中有不少打鬥場面都落在她身上，「都好大挑戰性，雖然話有跳舞底子，但始終係第一次拍打戲。」 能夠有機會初嘗做打女，自言是非常好彩，「嗰時拍完《狂舞派》，有人訪問我仲想試乜嘢角色，王修平導演話不如去試吓拍武打片啦，《狂舞派》其實都係動作戲，咁不如下次就直情拍武打戲，點知今次真係開口中。」
問到下次又希望挑戰甚麼角色，「我要開口中，下次我要拍文藝片，其實自己好鍾意睇文藝片，拍廣告或者好多角色都係比較可愛怡人，成日都要笑，希望下次可以接到文藝片，而呢個角色係用眼神同動作去代替對白，因為我鍾意一啲比較安靜、深入嘅角色。」
演繹我是歌手
除了演戲之外，顏卓靈在剛剛的一年亦有新嘗試，與C AllStar的King合作了一首《戰場上的最後探戈》，令她重拾了對唱歌的熱愛，「嚟緊一年係會有新嘗試，好多謝King搵我合作，同埋搵我做佢哋嘅演唱會嘉賓，我第一次公開獻唱就係喺伊館，令我重拾咗對音樂嘅熱誠，演戲係鍾意，但由細到大都好鍾意唱歌，但冇諗到都可以成為一個發展方向。」
雖然打算發展歌唱事業，不過要決定唱歌風格，卻令她非常糾結，「初步嘅諗法係乜都試，因為我實在有太多面，同創作總監傾過，今日我可以係一個憂鬱小子，但聽日又可以好hyper，我鍾意跳舞，亦有抗拒跳舞嘅時候，我實在有太多面喇，其實我哋有個概念就係歌手都係演嘅，而歌手又有好多類別，所以我可以演繹好多唔同嘅歌手。」
為減壓學畫畫
顏卓靈最近為興趣之餘，亦為減壓而開始畫畫，「細細個我好鍾意畫畫，但普遍香港中學生係慘啲，因為功課壓力太大，慢慢捨棄咗好多關於藝術，甚至係體育方面嘅嘢，所以我見自己今年都已經拍咗4部戲，我要休息喇，所以係呢段時間不如搵啲嘢學啦，學緊畫畫同打鼓，兩樣都係自己鍾意嘅嘢。」
在拍攝4套電影的過程中，曾經都令她感到回不過氣，「一部接一部，角色未抽離就要去下個角色，同埋自己會胡思亂想，拍咁多戲都唔係純港產片，但我好想港產片好好，一路諗辦法，一路搵啲年青幕後去一齊傾吓，所以畫畫都真係可以紓緩急躁嘅性格。」
最愛恤衫長褲
象的顏卓靈，表示自己私底下非常男仔頭，而且極不愛穿裙，「大個咗真係唔知點解唔鍾意着裙，第一可能係身體差，就算着長裙都覺得凍，第二就係唔方便，因為我實在係興奮起上嚟就會跳嚟跳去，始終長褲係好啲。」着衫亦偏愛boylish style，「恤衫成日着，有時着番普通圓領會覺得唔夠型。」
更多精采時尚內容，盡在 http://add.appledaily.com 。