有法律界桂綸鎂之稱嘅大律師容海恩，為新民黨葉劉淑儀效力搞「海上絲綢之路協會」，噚日二人孖住公佈協會嘅「張騫計劃─大學生暑期實習項目」內容（圖）。同葉劉越行越埋，「桂綸鎂」卻仲未入黨，強調若入黨會公告天下，並聲言無意9月參選立法會，自嘲唔係小花係大花。
「張騫計劃」約有100個實習空缺畀大學生同職訓局學生申請。黃絲有冇份先？葉劉話，絕不介意學生背景，且面試係由各大學嘅學生事務處同提供實習空缺嘅公司負責，同學去嘅地方都係一帶一路嘅沿線國家。
點解計劃以張騫命名？葉劉話因為張騫通西域，但中史書話喎，張騫出使西域時被匈奴擄走，參加嘅同學會唔會好似張騫咁呢？葉劉話，人生總有挫折先叫好，冇問題嘅……佢話。