邁進二零一六的新聞真是「一被未平，一被又起」，如果「被失蹤」像恐怖片，「被平安」就是荒誕鬧劇，而峰迴路轉發展到「被叫雞」，則應了沒有最賤格，只有更賤格，這樣的爛片除了割櫈爆粗拂袖離場，實在不能有第二種反應。高高在上的監製看着小丑惡劣的表演，老懷當然大慰，群情再洶湧也闊佬懶理，反正無論如何是不會回水的，你們愛不愛看戲都會繼續演下去。好學的我，向來擅於在逆境中增長見識，消極者稱之為苦中作樂，但所謂經一事長一智，總好過成世懵盛盛做井底蛙。譬如「熟途老馬都知，喺香港仔甚至長洲，夜晚都有俗稱洗頭艇返內地桂山島、伶仃島、外伶仃島，既唔使用回鄉卡，又冇出入境紀錄」，我聽了只感到五雷轟頂：呢位阿叔真係太不夠朋友，有咁方便嘅捷徑又唔早講，累我次次北上尋歡都依正手續申請簽證，大拿拿千幾文港幣，用嚟揼骨一個唔覺意連大肚腩都揼出六塊腹肌。
神奇的洗頭艇究竟是什麼東東？老餅馬上想起從前深夜渡輪收工後往返港九的嘩啦嘩啦，雖然未曾親身乘搭，但在一部胡燕妮主演的言情片（好像是《昨夜夢魂中》）見過，烏燈黑火頗有同是天涯淪落人的綺艷風情，基佬假如混雜在一班漏夜趕去嫖妓的麻甩佬群中，應該大有作為，前後左右都是高漲的賀爾蒙，不難未泊岸便即席揮毫搞掂三四件，為成語「暗渡陳倉」寫下新定義。不過那三個島聽起來不很開胃，桂山還罷了，最多下船後努力攀爬，伶仃如此淒慘，逗留太耐容乜易患上抑鬱症，更不要說和外太空看齊的外伶仃，撞正麥迪文你話點算？