告氏兄弟這晚谷草旺爆，第二場先有大佬告達理爆27倍冷門贏「飛快叻」，第三場三班一哩，輪到細佬告東尼勝出「非常堅」，第二口孖寶就此落入呢對好兄弟手中，每注派過千元，可謂非常和味！
早於元旦日，告東尼已憑「萬事勇」捧走華商會挑戰盃，打響新一年頭炮之餘，更為自己補賀平安夜生日，這晚轉戰谷草，一向撐華將嘅佢，找來楊明綸首度替「非常堅」操刀，結果人馬即時擦出火花，此駒爆7.8倍半冷Win開齋，組合獨贏A2派28元正，馬主鄭俊基夫婦亦告打破近三年頭馬荒，蓋自從「非常精」於2013年2月20日勝出谷草一哩後，「非常」系馬直到這晚先至再次贏馬。
今場二至四名爭到頭崩額裂，影相之下，38倍「新妙星」得第二；三、四名則分別由有飛馬「紅駿」及「贏到爆」拎到，四重彩派五萬七千幾，至於大熱門韋達之「為食仔」拉士力弱任過唔嬲只跑第五，韋達繼續守齋沉淪。
在大台電視劇《愛·回家》飾演林希雅（Amy）的劉溫馨有份拉頭馬，劉溫馨曾參加2013年香港小姐，但不敵陳凱琳等人只得第4，之後成為無綫電視藝員。劉溫馨說自己第一次入馬場，即有得拉頭馬好開心。
「非常堅」馬主鄭俊基表示，愛駒上仗季内初出跑沙田草地1600米快放得第四名，可見擺前走戰略合發揮，今仗再出轉爭谷草1650米亦有一定信心，希望馬兒保持進度，將來再交出好表現。