周二NBA常規賽，小馬憑迪朗威廉士（Deron Williams）喺第二節加時最後0.3秒命中一個三分球，以117:116絕殺帝王；而倒戈嘅帝王控衞朗度（Rajon Rondo），今場就因為腰傷缺陣，終止球隊兩連敗嘅頹勢。
31歲嘅迪朗威廉士喺周一仲受左腿筋拉傷困擾，不過佢今場仍然正選上陣43分鐘，18投10中，包括三個三分波，取得全隊最高嘅25分。而佢喺第二節加時階段，更加射入絕殺三分球，幫助小馬以一分之微險勝帝王，成為球隊嘅贏波功臣。呢球勁似卡達（Vince Carter）喺13/14季後賽西岸首圈第三場，最後1.7秒入嘅絕殺三分波；當時卡達亦都憑呢球，助小馬贏馬刺109:108。迪朗喺賽後掩飾唔到佢激動嘅心情：「呢場明顯係我喺小馬以嚟最精采嘅表現。入波嗰一刻實在太突然啦，我差啲呼吸唔到。」
而盛傳同小馬教練卡利奧（Rick Carlisle）不和嘅朗度，今場雖然因傷唔能夠上陣，不過佢喺訪問度透露自己未曾憎恨過小馬：「雖然我同佢夾唔嚟，不過我喺每場比賽都用盡全力，所以我唔會感到後悔。」