港股噚日繼續risk off，能否回穩，關鍵係人仔跌勢能否受控，只要確認中央有能力令人民幣短線回穩，港股跌勢先有可能暫告一段落，結論係繼續食花生。跌市的確令人變得消極，但長線機會有時會喺跌市之中慢慢出現，若然喺身邊發現被低估嘅股份，就算呢一刻唔買，點都要備忘咗先。
不如先講一個故事，回帶至2008年，金融風暴前後，港股一片狼藉，股票望起上嚟都特別樣衰，正值金融海嘯低谷之時，I.T（999）公佈差勁半年業績，雖然收入增長，但僱員成本勁升、又發認股權畀員工，令純利跌逾六成，市場上一片媽媽聲，大家不斷質疑佢財政管理能力，股價急跌到0.4元樓下。不過，當你睇完報紙，再落一落街，就有唔同觀感，因為當時後生仔喺香港買潮服嘅選擇不多，晉佳諗住換季，喺尖沙嘴買完又買，都係買緊I.T旗下嘅品牌，證明當時I.T唔覺唔覺成為香港男裝衫嘅壟斷者之一。
2009年開始，港股回升，加上自由行消費帶動，I.T股價2010年衝上7元樓上，兩年回報足20倍。故事證明，喺跌市之中，業績、賬目有幾衰不是重點，關鍵係間公司喺經濟困局之中，形成無敵嘅行業佈局，如果佈局得好，他朝好景之時，又願意花精力改善經營陋習，股價就有飛雲嘅機會。
家陣市面上有冇呢啲機會？之後再講。
晉佳
https://www.facebook.com/advanceguy1/