巴塞前鋒尼馬近排勢頭似乎想蓋過球王美斯咁款。尼馬早排同波神米高佐敦合照，都估到係有啲嘢搞，據講今年秋天將會推出專屬特別版Air Jordan 5 Low。另外據報巴西國家隊教練鄧加，亦決定咗揀尼馬，作為今年里約奧運男足三名超齡球員之一。至於美斯就可能少咗條財路，佢同電玩商EA Sports即將約滿，有傳年尾出嗰隻《FIFA17》遊戲，將唔再用美斯做封面。