周一火箭作客爵士嘅NBA常規賽，雖然火箭以93:91反勝，不過當家球星夏登（James Harden）喺比賽途中，俾主場球迷（箭嘴示）用激光射眼，當時佢仲作勢將手上嘅籃球掟向嗰名球迷，以示不滿；肇事球迷即時被驅逐離場，更被罰禁止進入NBA場館一年。夏登事後話自己係首次遇上呢種情況：「我初頭被射中嗰陣，以為佢（球迷）只係用咗閃光燈影相；不過當我射罰球嗰陣，隻眼再次俾人射住，球證亦比我發現得更早。」