海洋公園新一年或有喜事！園方現有三隻川金絲猴（圖），其中樂樂已6歲，其其同虎虎5歲，已屆成熟期，非常有心有力！
雄性川金絲猴其其係因應瀕危物種繁殖合作計劃，而喺去年9月加入海洋公園大家庭，園方話呀，其其喺近期嘅繁殖季節表現好活躍，動物護理同獸醫團隊都觀察到佢同兩隻雌性川金絲猴夥伴、即係樂樂同虎虎都有交配行為，嚟緊會密切觀察佢哋嘅行為同身體狀況，希望首隻在港繁殖嘅川金絲猴BB可以喺猴年誕生。
另外，園方特別喺年初七情人節推出「神秘深海之夜︱︱特別版」，限15對有情人參加。拖友除咗可以夜遊「尋鯊探秘」同「冰極天地」，學習鯊魚習性，仲可以喺展館徹夜談心。包早、晚餐嘅二人套票盛惠港幣$3,160。