本地大型商場為做推廣，一般好鍾意搵各款卡通公仔作招徠，吸引市民去商場搵公仔影相，從而帶動人流，舉行有藝術成份嘅展覽唔算多，九龍倉（004）旗下銅鑼灣時代廣場本月就為84歲退休醫生黃貴權，舉行名為「我的四季頌」嘅攝影作品展。
黃貴權跟藝人周潤發老友鬼鬼，兩人都係攝影發燒友，曾於2009年喺香港中央圖書館舉辦「香港印象」聯展。黃貴權早於1959年喺香港大學醫學院畢業，係內科專科醫生，2006年退休。
佢多年前喺一個訪問中提過，經歷好多生老病死，於是希望培養一種嗜好去平衡工作，喺繪畫與攝影之間，選擇咗後者，1966年開始跟名師鄧雪峰學攝影，一攝就幾十年。今次展覽由周六開始至月底，將會展出佢51幅「四季頌」作品。