眨吓眼，貝諾華同湛明諾喺香港出賽兩個月，最初兩位騎師都似唔太適應，特別係湛明諾初期經常漏閘，不過佢哋學習能力好強，至今貝諾華已贏出5場，湛明諾則有3WIN，勉強過得去。其中湛明諾牌照今個月17號賽事到期後，會返法國準備新賽季。而下月14號賽事才約滿嘅貝諾華，就因為一個「追魂call」，搞到頭都大埋，可能要提早解約離港。
貝諾華係Al Shaqab Racing賽馬集團喺法國嘅主帥，呢個來自卡塔爾嘅大馬主財雄勢大，全球多國有參與賽馬同育馬事業，係近年歐洲大賽常客。貝諾華早幾日接到老闆「追魂call」，雖然歐洲冬季未有大賽舉行，但卻要求佢早啲返去法國，幫手操馬和開會，為今年做好部署。
據知貝諾華日益喜歡香港競賽環境，亦好想留喺度過農曆新年，感受一下大年初三跑馬嘅熱鬧氣氛，不過老闆落order，身為打工仔好難say no，貝諾華話有能要提早喺今個月中離港，或者只跑至本月17日賽事，他謂無論如何，點都希望盡量贏馬，留個美好回憶。
睇番貝諾華今期(6日)座騎，第八場三班1200米，賀賢隻「哥哥仔」上仗在港初出162倍，即喺貝諾華胯下走入平頭季軍，貝諾華話連佢都嚇咗一跳，隻馬直路冇乜空位，居然夾硬交出咁凌厲嘅衝刺，證明質素高鬥心強，熱咗身後隨時更進一步打開勝門。