浸會大學60周年校慶活動周六揭幕搞「浸大健樂日」，邀請咗啱啱面傷好番嘅民望高、食物及衞生局局長高永文主禮；至於民望低嘅梁振英呢？校慶特別活動籌備委員會主席梁永祥話呢個活動性質「未去到請佢」，睇吓將來仲有乜活動啱CY。
早前著名浸大校友以「拼湊」形式唱出校歌《我們都是浸大的》，MV因負評過多而極速下架，有「樓神」之稱嘅浸大校友、校慶特別活動籌備委員會成員趙國雄（圖）話，校友緊張母校先咁着緊表達不滿，又話正如樓盤，有時外界講到個盤幾咁差，反而大賣喎。
講番呢次浸大健樂日，除咗有唔少健康、運動講座之外，仲有浸大最出名嘅中醫為市民行醫施藥，當日朝10晚6為公眾人士義診，每人可獲贈兩包中藥，但公眾人士要先上浸大60周年校慶網頁預約，據聞已滿額。