港鐵喺機場快綫九龍站往機場方向月台設立咗一個「港鐵展廊」，介紹港鐵歷史。展廊其中一個最大亮點就係由8,000張舊車票組成嘅「港鐵車票回憶牆」。當中唔少係已經絕版嘅罕有車票，包括1979年首張紀念車票，同埋部份從未公開過嘅內部測試車票等等。
八方聽聞，有啲罕有車票連港鐵本身都無保留，要四出向收藏家搜羅番嚟。港鐵車票亦可以回味到有趣舊事，例如有一套1992年TVB銀禧紀念票，有「四大天王」㗎，包括劉德華、黎明、郭富城，同埋……張衛健。點解唔係張學友？唔好問八方啊！
展廊裏面又有巨型屏幕，播放港鐵發展史短片，比例有一比一嘅列車模型，陳列不同年代車廂設計，又有3D自拍區。展廊將於今年第二季開放畀市民預約參觀，費用全免。