猴年仲有一個月就到，又係時候大掃除洗邋遢。僱員再培訓局噚日就公佈咗家務助理平台「樂活一站」今年大掃除服務嘅收費詳情，每個鐘只要95至125蚊，就有一個受過嚴格訓練嘅專家幫你執屋，啱晒想蹺埋手收爐嘅你。
服務收費同舊年差唔多，越近年關越貴。九龍及新界一個鐘建議收95至120蚊，港島及離島就因為車費收貴啲，一個鐘收105至125蚊，最低消費係3個鐘，人數及時間視乎屋企面積。
除咗打掃，幫襯「樂活一站」都可以做善事。每10個人使用新年服務，贊助商新地就會捐1次服務畀獨居長者或者殘疾人士，等佢哋舒服過年。登記服務網址： http://www.erb.org/smartliving