平日返工咁辛苦，有乜爽得過去旅行叉電？星展香港行政總裁Sebastian Paredes舊年底，一家大細去咗印尼峇里島度假，叉足電先嚟返工，噚日佢出席活動時仲輕輕拍自己塊面，好風騷咁話：「有冇見到我塊面？一睇就知我放咗個長假叉足電喇！」
除咗容光煥發嘅Sebastian，升職無耐嘅星展集團零售銀行業務副主管潘燕明（Pearlyn）都笑得好燦爛，佢稍後時間會調返老家新加坡，不過香港未搵到接任人嘅期間，仍然會多啲時間留喺香港。
噚日係星展與宏利（945）展開15年銀保合作嘅記者會，宏利要分期支付12億美元（約93億港元）畀星展，咁肉赤，點解宏利大中華區總經理何達德（Michael Huddart）仲咁開心？佢話呢個係一個好刁，可以加強佢哋亞洲嘅業務發展咁話。