屹立銅鑼灣50幾年、電影《2046》與《花樣年華》嘅取景場地金雀餐廳，舊年9月突然結業，新近收到風，原址將會一分為二，一半做餐廳，一半轉租畀聖安娜餅屋。
1962年開業嘅金雀餐廳本來承租蘭芳道13至15號地舖，兩舖打通夾埋2,400呎，裝潢保留六十年代懷舊風格，餐廳舊年9月20號做完最後一日生意結業。一直有消息指，部份股東會重開餐廳。
聽聞，金雀餐廳將會喺今年稍後重開，但只會繼續租用13號地舖，即係面積縮細一半，目前做緊裝修，未知幾時正式重新開業。至於另一邊15號地舖，已經由聖安娜餅屋預租，月租12萬元，比業主叫價平8萬元。
翻查資料，金雀喺1989年租用15號舖嗰時，月租已經要7.4萬元，即係聖安娜個租金只係比27年前貴六成。