衞冕嘅俄羅斯靚女球手舒拉寶娃，同埋首號種籽羅馬尼亞嘅哈蕾普，周二齊齊因傷退出布里斯班網賽，不過應該趕得切參加本月18號開波嘅澳洲網球公開賽。原本周二會喺女單首圈對同鄉瑪卡露娃嘅舒娃話，日前喺練習時整傷左前臂，但去到比賽前仲係有啲痛，無奈退賽。不過有口痕友話，舒娃個前度狄美托夫都打緊布里斯班網賽，佢位新女友、「黑帝」咸姆頓舊愛妮歌仲特登飛嚟澳洲捧場，舒娃費事眼冤，於是借勢退出比賽喎。